A Escola de Altos Estudos Musicais ofrecerá unha serie de concertos como parte do proxecto formativo do alumnado do Curso Avanzado de Especialización Orquestral (CAEO). Esta iniciativa, que pertence ao ciclo “A Escola na Cidade”, terá lugar no Paraninfo da Facultade de Historia da USC, ás 19:30h os días 4, 5, 9, 10 e 11 de xuño. As actuacións representan o colofón dos seus estudos e o alumnado estará acompañado polos seus respectivos titores.

O primeiro concerto, o mércores 4 de xuño,  estará protagonizado polos alumnos Xiana Baliñas e Francisco Javier Ruiz Rivas, viola e óboe, respectivamente. Na ocasión, escoitaremos a interpretación de Baliñas de obras de Robert Schumman e Johann Nepomuk Hummel, mentres que Ruiz tocarás obras de Georg Phillip Telemann, Amadeus Mozart e Richard Strauss.

Deseguido, o xoves día 5, será a ocasión dos alumnos Pero Budiño Pinaque (violín), Roi Guzmán Gómez (trompa) e Belén Aragunde Canabal (frauta). Budiño interpretará obras de Johann Sebastian Bach, Claude Debussy e Johannes Brahms, mentres que Guzmán encargarase da interpretación de composicións de Reinhold Glière. O peche desta noite estará a cargo de Arangunde coas obras de Giacinto Scelsi, Pierre Sancan e Wolfgang Amadeus Mozart.

Xirando sen descanso por toda Europa, The Toasters conseguiron ter unha lexión de fans europeos, atraíndo a novas xeraciones e facendo o ska popular máis aló da súa propia escena. O seu son dinámico, coñecido popularmente como o “East Side Beat”, é a principal característica do ska de the Toasters como música urbana.

Erupcións volcánicas, impactos de meteoros, grandes dioivos, xigantescos dinosauros, abraiantes criaturas mariñas... Orixes recrea unha natureza salvaxe onde volven á vida seres hoxe desaparecidos, pero tamén descubrimos outros que habitan a Terra desde hai millóns de anos, desde moito antes de que o ser humano pisara o noso planeta.

A experiencia sensorial inmersiva Orixes atravesa catro mil millóns de anos de evolución do noso planeta: desde unha inhabitable bóla incandescente, ata a extinción do temible tiranosauro-rex, pasando pola explosión da vida nos océanos ou a aparición dos primeiros grandes bosques na superficie terrestre.

A experiencia é accesible a partir dos 8 anos de idade, e as nenas e nenos menores de 12 deben realizala co acompañamento e vixilancia dunha persoa adulta responsable que deberá adquirir tamén unha entrada.

Faladoiro a cargo do equipo profesional da Asociación Fonte da Virxe, centrada en saúde mental. Esta sesión achegará ferramentas prácticas e testemuñas desde a experiencia profesional e humana. Tamén se abordará o papel preventivo das actividades socioculturais, incluíndo a musicoterapia como camiño cara o benestar.

Pilar Albarracín (Sevilla, 1968) foi unha das creadoras claves na renovación das linguaxes artísticas en España durante os anos noventa. Nunha escena ata entón dominada pola pintura e a escultura, o seu traballo foi pioneiro no uso da fotografía, a performance ou a instalación como medios de expresión artística, e contribuíu a formular algunhas das cuestións fundamentais para entender a evolución das prácticas artísticas nas últimas décadas. 

Mandala (Arc en ciel) (2012) forma parte dunha serie máis ampla integrada por outras cinco pezas que actualmente pertencen ás coleccións do CAAC de Sevilla e o MUSAC de León. A obra exposta no hall do CGAC está constituída por un conxunto de bragas usadas de diversas cores e tamaños dispostas en círculos concéntricos. Neste contexto, as pezas de roupa interior femininas adquiren un significado novo e profundamente simbólico, modelando un universo sagrado onde se combinan harmoniosamente o individual e o colectivo.

Ao longo da historia, as mulleres sempre foron relegadas nas marxes da educación artística. Expedientes para o establecemento dunha escola de nenas nos que se especificaba que o interese que existía para que as mulleres aprenderan a debuxar era, unicamente, que puideran despois trasladar a aprendizaxe a labores de bordado, citas nas que se expoñía que as nenas debían sentarse lonxe dos nenos para non distraelas, ou escritos nos que se explicaba que as nenas tiñan que atender a clase polas mañás porque ningún pai querería que a súa filla volvese a casa de noite.

A escaseza de alumnas matriculadas e a súa práctica inexistencia dentro dos cadros de persoal do profesorado demostran as grandes dificultades que tiñan as mulleres para accederen a ensinanzas artísticas. Con motivo do Día Internacional da Muller, o Arquivo de Galicia inaugura a exposición Mulleres artistas: aprendendo o oficio, que reflicte o difícil camiño ao que moitas tiveron que enfrontarse para conseguir o recoñecemento social da súa capacidade creadora, así como o acceso á educación artística.

A mostra exhibe un total de 39 documentos orixinais de entre 1785 e 1962 procedentes dos fondos da Real Sociedade Económica de Amigos do País e a Escola de Artes e Oficios. Informes, regulamentos de funcionamento das escolas, fotografías, láminas utilizadas como modelos para a aprendizaxe do debuxo ou exercios realizados polas alumnas son algúns dos materiais que podemos atopar nesta mostra e que reflicten a situación das mulleres na educación artística en Santiago de Compostela.

Rafael Úbeda leva pintando sete décadas. A exposición Úbeda. Visión retrospectiva abrangue unha ollada completa da súa traxectoria creativa, afondando nos fitos máis relevantes da súa obra e das pezas representativas que marcaron cada etapa do camiño. 

O artista, logo de sete décadas en activo, representa unha parte da historia da arte que enriquece o patrimonio de Galicia, así como unha das figuras das artes plásticas máis notables en España con conexións en diferentes lugares e escolas de Europa.

Esta mostra supón un relato pictórico que ten en conta as súas etapas vitais, moi vencellada aos lugares nos que habitou (Pontevedra, Madrid, Holanda e Italia). A exposición propicia unha viaxe polo universo e a biografía dun creador que representa un dos nomes principais da pintura galega. Así, o Museo Centro Gaiás reúne nesta mostra 56 pinturas, cinco debuxos e unha peza audiovisual inédita que axuda a comprender a súa evolución.

A pluralidade como concepto central que nutre estilos, técnicas e perspectivas é a idea da que emerxe DIVERSA, V Mostra Internacional de Ilustración Contemporánea Afundación #MiiC5, que achega a Santiago de Compostela unha selección das propostas máis representativas da ilustración actual. Nesta V edición, a exposición explora como a variedade cultural, a conexión coa nosa contorna e as experiencias persoais das e dos artistas converxen para dar forma a un discurso visual que dialoga cos grandes retos e temas do noso tempo. Outra volta, convidámoste á Sede Afundación na Rúa do Vilar para descubrir unha creatividade fascinante.

A mostra, procedente do Museo Provincial de Pontevedra, reúne 52 imaxes tomadas polo fotoxornalista Xan Carballa durante os actos levados a cabo en Santiago con motivo do retorno a Galicia dos restos de Alfonso Daniel Rodríguez Castelao, o 28 de xuño de 1984. 

Comisariada por Xosé Enrique Acuña.

A exposición é o resultado dun primeiro proxecto sobre as mariscadoras de Muros, coas que Cris Romero traballou durante tres anos fotografando a súa vida cotiá na ría. “O seu esforzo e tesón contra todo pronóstico, o mal tempo e o cesamento da actividade foron unha constante no meu esforzo por reflectilo nas miñas fotografías, por valoralas, e por darlles unha plataforma para dar a coñecer o seu traballo, algo que todos coñecen en Galicia pero non no resto de España”, asegura a autora. O resultado foron dúas exposicións, unha en xullo de 2023 no Molino de Mareas de Muros e outra en marzo de 2024, en Madrid con motivo do Día da Muller, e a edición dun libro.

Alfonso Zarauza (Santiago de Compostela, 1973) está a celebrar trinta anos facendo filmes, desde Compostela para o mundo.

A mostra Nunca deixará de chover no meu cinema percorre estes anos adicados a unha profesión que o recoñece como un dos autores máis relevantes do audiovisual contemporáneo galego. 

Nos diferentes espazos da Zona C amósase unha escolma de materiais feita polo propio cineasta que achega o público ao proceso creativo e técnico que se atopa tras o seu traballo: carteis, guións, documentos, fotografías de rodaxes e de actores e actrices, hoxe xa con longa traxectoria, xunto a outros materiais relacionados co seu traballo, na que será unha experiencia enriquecedora para quen queira afondar no seu traballo.

Unha ollada que é reflexión sobre a propia cidade, sobre esa Compostela na que vive e na que desenvolve moitos dos seus proxectos; esa cidade que é punto de partida e de retorno e na que sendo aínda novo decidiu rodar a súa primeira curtametraxe Hay que joderse (1995). Esta peza, amateur e naif,  seria o comezo da súa prolífica carreira.

Gregg Simpson e o comisario independente Allan Graubard, que colaboraron en dous libros, Sirenes e Western Terrace, presentan unha exposición da preocupación de Simpson pola Escola de Pont-Aven de artistas como unha reimaxinación surrealista dese grupo.

Comezan co regreso de Simpson á imaxinería arcana e os símbolos herméticos establecidos na serie Dream Gardens de 2018-2019, recentemente exposta en París, Copenhague, Roma, Turín e Padua. Igual que Gregg Simpson, moitos do grupo de Pont-Aven interesáronse pola teosofía e afondaron no ocultismo e nas relixións orientais, o que levou á formación dos Nabis (ou Profetas), cuios intereses polo simbolismo precederon a algúns aspectos do surrealismo.

A exposición inclúe alusións á “coiffe”, o icónico tocado das mulleres tradicionais bretonas, cuios orixes remóntanse aos druídas celtas. Os lenzos son alegorías metafísicas definidas con precisión, incluídas obras nas que aparecen formas ataviadas en peregrinación, como no cadro de Simpson El camino de Pont-Aven.

As obras sobre papel están realizadas en gouache e pastel e son de creación máis espontánea nun principio, pero complétanse con certa precisión. Nas vitrinas expóñense Los módulos bretones, pequenas obras sobre papel que o artista creou mentres viaxaba por Italia, e Los talismanes de paisaxe realizados plein-air mentres recorría Pont-Aven.

As anteriores exposicións de Simpson na Fundación Eugenio Granell, e a aceptación da súa obra na colección permanente da Fundación, prepararono para futuros éxitos, como a súa participación na gran exposición e libro Surrealismo sen fronteiras, celebrada no Museo Metropolitano de Arte de Nova York ou no Tate de Londres.

A Galería Trinta acolle a exposición Aproximación formal do artista Xurxo Martiño, unha proposta que explora os límites da forma a través dunha ollada precisa e sensible ao xesto e ao espazo. Nesta mostra, Martiño desprega unha serie de obras nas que a materia, a xeometría e a textura dialogan en equilibrio, dando lugar a composicións que convidan á contemplación pausada. Aproximación formal preséntase como unha reflexión visual sobre os procesos de construción artística e sobre a relación entre o orgánico e o estruturado.

A XIII Bienal de Fotografía Etnográfica das Socias e Socios do Museo do Pobo Galego, Entre Amigos, ten este ano unha temática marcada fundamentalmente polas Letras Galegas 2025, con varias instantáneas sobre o patrimonio inmaterial referido á nosa música, como son as de Denís Estévez, José María Laredo Cordonié, José Francisco Mëndez García, Jesús García Devesa, Nolo Suárez, Manuel Otero López e Lois Ladra. 

Tamén participan, con outras temáticas Anxo Regueiro, Carmen Villar, María Soledad Pintos Peñaranda e María Jesús Fariña Busto.

Mostra sobre Castelao na súa dobre vertente de docente no Instituto de Pontevedra así como de cidadán que compartiu, a través da súa obra, a súa visión crítica sobre a situación da escola na Galicia que lle tocou vivir.
 

Unha iniciativa baseada na idea de Noamí Batllori que pretende achegar a arte ao público infantil e adulto.

Con esa premisa, desde centros socioculturais ofrecese un planazo artístico, sen saír da cidade, sen limitacións de capacidade, ao aire libre, sen aglomeracións nin colas, sen horarios e con entrada de balde, e todo isto, dentro dunha caixa/museo de 13x13 cm.

O obxectivo e encher a cidade de pequenos museos da arte, que estarán montados desde o 14 de maio ata o 11 de xullo do 2025 en distintos escaparates de todo Santiago.  

Exposición das artistas madrileñas Consuelo Chacón e Patricia Mateo e o artista, tamén madrileño, José Luis López Moral.

Este proxecto multidisciplinar, que transita fotografía, pintura, vídeo, instalación e son, adéntrase dende a arte, a experiencia e a natureza no universo das meigas, do patrimonio botánico e da tradición galega, no imaxinario das lendas e das supersticións, nos saberes populares que tan firmes alicerces teñen construído na cultura senlleira do noso país. 

A partir dunha profunda investigación e un intenso traballo de campo, percorrendo moitas trazas da xeografía galega e indagando nas febras da tradición e da memoria, con obras de pintura, fotografía e instalación, Consuelo Chacón, Patricia Mateo e Jose Luis López Moral sumérxennos en mundos máxicos, cheos de simbolismo e ambigüidade, atmosferas de ensoñación e simulacro que transitan entre o real e o ficticio, reivindicando o valor da sabedoría popular e da natureza, a rica raíz da identidade cultural galega, o papel das 'bruxas' e dos relatos que se tecen nas marxes do discurso sistémico. Sempre na procura de interpelar e situar ao público, nun estado simbiótico de cuestionamento, estrañeza e fascinación, para que, na procura de respostas, só atisven preguntas, nas que tal vez, atoparse a un mesmo, a unha mesma.

Comisariada por Paula Cabaleiro.

Unha exposición para poñer o foco en todas as mulleres que mantiveron viva a poesía e a música de tradicional oral e para coñecer tamén como foi evolucionando a súa recollida e posta en valor ao longo dos tempos. Tesoureiras do noso é unha mostra na que a Biblioteca de Galicia, con motivo do Día das Letras Galegas 2025, recompila libros, cancioneiros e material audiovisual para comprender a todas esas mulleres que comezaron a tocar e cantar con pratos e sachos por pura necesidade de diversión e goce ata chegar co seu legado aos escenarios. 

Exposición de pintura e escultura do artista Xaquín Chaves.

Exposición da polifacética artista portuguesa Francisca Aires Mateus.

Nesta mostra, Aires reflexiona sobre o concepto de tradución: un proceso que permite comprender mentres altera o significado orixinal da mensaxe.

A exposición está feita en colaboración con Appleton – Associação Cultural.

Ás 12.30 horas do día 24 de maio, e como parte da programación da VI edición de Plataforma, Festival de Artes Performativas, terá lugar a performance titulada LN Performance, protagonizada pola propia artista.

Esta mostra supón un percorrido expositivo polas diferentes etapas artísticas e vitais de Eugenio Granell dende a súa vinculación con Galicia como referente de moitas das súas producións ao longo de toda a súa vida, neste senso faise unha alusión especial á obra do seu irmán, Mario Granell.

Nestes 30 anos, a Fundación Granell pasou por diferentes etapas, sempre baixo unha única traxectoria: protexer, difundir e estudar o legado de Granell e do Surrealismo, dende diferentes ópticas e dando a oportunidade a moitos artistas de amosar o seu traballo ademais de  facer participe aos diferentes públicos dende o local ao internacional.

A exposición Boutique Amparo, comisariada por Eduardo Valiña forma parte das mostras conmemorativas do trinta aniversario do museo.      

Unha viaxe solidaria e creativa á vida é unha exposición colectiva de máis de 30 artistas coordinados por Manuel Nieto a beneficio do proxecto "Viaje hacia la vida". 

A mostra está organizada por Tierra de Hombres.

A exposición La Planitud do artista Adrián García preséntase na Galería Metro de Santiago de Compostela, ofrecendo unha reflexión crítica sobre a superficialidade e a inmediatez na sociedade contemporánea. Inspirado na linguaxe da publicidade, García cuestiona como estes elementos afectan á percepción da realidade, propoñendo unha ollada introspectiva a través das súas obras. A mostra convida ao espectador a reconsiderar a profundidade do pensamento nun mundo dominado polo efémero

Nesta exposición, enmarcada nos actos do 30 aniversario da Asociación do Traxe Galego, reuniranse entre quince e vinte traxes antigos completos, ou semicompletos, das catro provincias galegas.

Máis de 100 prendas xuntas no mesmo lugar. Así mesmo contarase tamén con réplicas exactas de prendas antigas, das que só se ten coñecemento por fotos ou porque o seu estado de deterioro non permite que sexan expostas. 

Trátase de traxes datados entre o século XVIII, XIX e principio do XX que responden ás características máis representativas do vestir das clases populares das distintas comarcas galegas neste período histórico e que permiten ter unha perspectiva real e mesmo física da verdade da indumentaria de Galicia. 

Composta por 50 obras, ‘Humor para mudar o mundo. Que graza!‘ é un título que recolle o que pretende Pepe Carreiro, coa súa forza creativa nas súas dúas sentencias: unha primeira, frase en serio e pretensiosa (Humor para mudar o mundo), que logo, na segunda, cunha contestación burleira (Que graza!) rebaixa as ínfulas da primeira parte e lle dá un baño de realidade.

Mostra organizada pola Asociación Cultural O Galo.

Unha viaxe a través do pensamento, da percepción e da nosa propia relación cos obxectos. Exposición organizada por Fotoforum Compostela.

A Asociación Fotoforum Compostela, entidade con doce anos de traxectoria que ten entre os seus obxectivos a promoción e defensa da lingua e da cultura galegas a través da fotografía, presenta, con motivo do Día das Letras Galegas 2025, un proxecto expositivo colectivo que toma como punto de partida a banda deseñada Os suicidantes, con guión de Diego Ameixeiras —autor residente na nosa cidade— e ilustracións de Tomás Guerrero, publicada por Xerais no ano 2023. A obra propón un futuro distópico ambientado en Santiago de Compostela.

O proxecto, patrocinado pola Secretaría Xeral da Lingua da Xunta de Galicia, inspírase no argumento e na estética de Os suicidantes, que se reflicte en 64 fotografías de inspiración noir, creadas por 23 persoas da asociación.

A mostra pode visitarse na libraría Couceiro entre o 17 e o 30 de maio, durante o horario habitual de apertura ao público. No propio Día das Letras Galegas repartíronse copias das fotografías en distintos espazos públicos do Casco Histórico, que se puideron non só contemplar, senón tamén levar, facilitando así o achegamento ao proxecto e á nosa asociación.